Áfengi | eafiness

Hitaeiningar í áfengi – þetta verða allir að vera meðvitaðir um

Það er gaman að gera sér dagamun og hitta góða vini, skella sér út á lífið og mála bæinn rauðan. En eitt skulum við hafa bak við eyrað, ekki að ég sé að mæla gegn því að fólk fái sér stöku sinnum í glas (einu sinni í mánuði, hámark), heldur að fólk, sem er að temja sér nýjan lífsstíl og læra á hitaeiningar, geti haft þessar staðreyndir á hreinu þegar skrá skal hitaeiningafjöldann niður.

Alkóhól hefur að geyma helling af óæskilegum hitaeiningum og blandaðir drykkir óhemjumagn af sykri.
Áfengi þurrkar upp líkamann, þess vegna erum við þyrst og þurr þegar við vöknum, ertandi áhrif áfengis hefur áhrif á fjölmörg líffæri, t.a.m maga og nýru og útskýrir það magaverki, niðurgang og annað huggulegt sem við kljáumst við daginn eftir fyllerí. Þurrkurinn sem líkaminn verður fyrir eftir drykkju útskýrir meðal annars höfuðverkinn og viðkvæmni okkar fyrir ljósi, hljóði eða bara hávaða.

Ein skotheld leið til að forðast þynnku er að sleppa því að drekka áfengi, en ef þú ert gríðarlega áhrifagjarn og laus við sjálfsstjórn og ákveður að demba þér í brennsann mæli ég með því að þú haldir þig við hvítvín, vodka eða gin en sleppir koníaki, sherrýi, viskýi og fleiri tegundum sem gætu innihaldið tréspíra og önnur alkóhól, þ.e.a.s ef þú vilt takmarka þynnkuna daginn eftir. Einnig mæli ég með að nota frekar sykurlausa gosdrykki í blönduna, helst sódavatn.

Jæja, þá er komið að uppáhaldinu okkar, ÞYNNKUFÓÐRINU.

Þynnkumatur er yfirleitt óhóflega saltaður, fitumikill og brasaður, vegna þess að við erum öll þurr og rugluð í kroppnum eftir brennivínið. Ónefndir staðir sem selja djúpsteikta kjúklingabita og ónefndir pizzustaðir verða oft fyrir valinu. Það er hægt að koma í veg fyrir þessa þörf. Að skella í sig einum Gatorade eða Powerade eftir fyllerí fyllir strax á salt-og vökvatapið og við vöknum ferskari. Einnig skal forðast að fá sér áfengi rétt áður en skriðið er í koju, bæði er það gjörsamlega ástæðulaust, heimskulegt og eykur þynnkuverkina til muna.

Fáum okkur skyr, banana eða próteinshake í þynnkuni, þrátt fyrir að líkaminn kalli á annað. Höfum sjálfsstjórn eftir stjórnleysið kvöldið áður. Þitt er valið.

Hér fyrir neðan er stuttur listi yfir hitaeiningar í ýmsum tegundum áfengis

Stór Bjór, ljós - 234 kkal

Stór Bjór, dökkur - 215 kkal

Hvítvínsglas, 175ml, sætt - 130 kkal

Hvítvínsglas, 175ml, þurrt - 116 kkal

Rauðvínsglas, 175ml - 119 kkal

Martini Extra Dry, 6cl - 58 kkal

Martini Rosso, 6cl - 76 kkal

Einfaldur Gin+Tonic - 124 kkal

Tvöfaldur Gin+Tonic - 176 kkal

Einfaldur Romm+Kók - 136 kkal

Einfaldur Romm+Diet Kók - 68 kkal